ଯାହା ତୋ ଆମର୍ ମୁହୁଁ କଲିଆ
କୁର୍ କୁଟି ଆର୍ ମେଁଢା ବାଲିଆ
କଅଁଲ୍ କସର୍ ଛାଡି ଛୁଣା କରି
ଶୁଖଲା ଚରା ଚର୍ ବ କେଁ
ତମେତ ସୁନ୍ଦୁରି ନନି ଆମର୍ ଠାନେ ଫଁସ୍ ବ କେଁ ।(1)
ବାଲୁତ୍ କାଲର୍ ସିଁଗନ୍ ନାକି
ହାରି ସୁକି ଯାଏଁ ତମ୍ କୁ ଦେଖି
ଏତ୍ କି ସୁନ୍ଦର୍ କେନ୍ତା ହେଲ
ମାକର୍ ଦୁଦୁ ମାଖ୍ ଲ କାଏଁ
ତମେତ ସୁନ୍ଦୁରି ନନି ଆମର୍ ଠାନେ ଫସଲ କେଁ ।(2)
କାଚିଁ କୁଣି ଦିନେ ଖେଲ୍ ଲା ବେଲେ
ଚୁମା ଦେଇଥିନି ତୁମର୍ ଗାଲେ
ଏବେ ଦେଖି ଦେଲେ ଭିର୍ କି ଯାଏସ
ସେ କଥା ଆର୍ କହେସ କେଁ
ତମେତ ସୁନ୍ଦୁରି ନନି ଆମର୍ ଠାନେ ଫଁସ୍ ସ କେଁ ।(3)
ଫେସ୍ ବୁକ୍ ତି ଚାଟିଙ୍ଗ କଲିଁ
ହ୍ବଟ-ସପ୍ ତି ସ୍ଟାଟସ୍ ଦେଲି
ରିଚାର୍ଜ ଗୁଟେ ନାଇଁ କରି ବଲି
ଏନ୍ତା ତୁଡେ ସଁପ୍ ବ କେଁ
ତମେତ ସୁନ୍ଦୁରି ନନି ଆମର୍ ଠାନେ ଫଁସ୍ ବ କେଁ ।(4)
ତୁଇ ଏକା ତର୍ ବାପାର୍ ପରୀ
ଆମର୍ ବୁଆ ଯାହା କଲା ବେକାରୀ
ଘରର୍ ପଛେ ଛାଏନ୍ କଣା
ସ୍ଟାଇଲ୍ ମରା ଛାଡ୍-ବ କେଁ
ତମେତ ସୁନ୍ଦୁରି ନନି ଆମର୍ ଠାନେ ଫଁସ୍ ବ କାଏଁ ।(5)
ଶିଲା ଯେଭେନୁ ଯୁଆନ୍ ହେଲା।
ସେନ ପାଉଡର୍ ଥୁତ୍-ନା ଗୁଲା
କେଜି ତୁକ୍-ଡି ତି ପକେଇ ଦେଲେ
କଁଟା ଛିଡି ଯିବା ବଲ୍-ବ କେଁ ।
ତମେତ ସୁନ୍ଦୁରି ନନି ଆମର୍ ଠାନେ ଫଁସ୍ ବୁ କେଁ ।(6)
ମାର୍ ବେ ଆଖି ଚନ୍ଦର୍ ମୁଖି
ମୁଲ୍ କି ହସିଁ କେ ଚାହାଁନି ଚାଖି
ଆମେ ଭେଣିଆଁ ଦେଖ୍-ମୁ ବଏଲେ
ଏନ୍ତା ଡିଜେନ୍ ମାର୍-ବ କାଏଁ
ତମେତ ସୁନ୍ଦୁରି ନନି ଆମର୍ ଠାନେ ଫଁସ୍ ବ କାଏଁ ।(7)
ଠେଙ୍ଗୁଆ ମସାନ୍ କିନ୍ଦରୁ ଥିମୁ
ଘର୍ ଦୁଆରି କେଭେ ସେ ହେମୁ
ହଁ ବଏଲେ କନିହାଁ କରତି
ତମର୍ ବା' କେ କହେତ କେଁ
ତମେତ ସୁନ୍ଦୁରି ନନି ଆମର୍ ଠାନେ ଫଁସ୍ ତ କାଏଁ ।(8)
ତମ୍ କେ ଦେଖି କୁଷ୍ଟଁ ସେଙ୍ଗା
ରମ୍ଭା ବି କାହିଁ ତରା କେ ଯିବା
ସର୍ଟ କଟ୍ ଥିଁ ଫେରେସ୍ ଅଛ
ଉଢଁନା ମୁଡି ପାର୍ ବ କେଁ
ତମେତ ସୁନ୍ଦୁରି ନନି ଆମର୍ ଠାନେ ଫଁସ୍ ବ କାଏଁ ।(9)
ତମ୍ କେ ନୁରା ସାଙ୍ଗର୍ ଜୁଲି
ଡାଣିହାଁ ହିରୋ ବିରାଟ୍ କୁହଲି
ବିହା ପଛେ ହେବ କିରନ୍ ପୁଲାର୍ଡ
ଆମ୍ କେ ହେଲେ ଦେଖ୍ ତ ଘାଏ
ତମେତ ସୁନ୍ଦୁରି ନନି ଆମର୍ ଠାନେ ଫଁସ୍ ତ କାଏଁ ।(10)
ମୁଡର୍ ବାଲ୍ ଟା ଭୁର୍ ଭୁସିଆ
ଛୁଆ ଫୁଟାବେ ବେଛୁ କଟିଆ
ମଝିର୍ ମାଙ୍ଗେ ଢେକୁନ୍ ବସା
ବକୁଲ୍ ବୁକଲା ଛେର୍ ଲା କାଏଁ
ତମେତ ସୁନ୍ଦୁରି ନନି ଆମେ କହେଲା କେ ଦୁଖ୍ ଲା କେଁ ।(11)
ପହେଲା ପ୍ଯାର୍ ବମ୍ବେ ଲଡୁ
ବିହା ଉତାରୁ ପଡ୍ ବା ଝାଡୁ
ଇ ଟୁକେଲ୍ ପଛେ ସମିଆ ଗଲେ
ଜୀବନ୍ ଗେନ୍ଧା ଜିଁଲୁ କେଁ
ସୁନୁଥ ସୁନ୍ଦୁରି ନନି ଗୋ , ଭୁଲ୍ ଭାଲ୍ ଭାଏଲ୍ କହେଲୁଁ କେଁ । (12)
ଆଏଜ୍ ଇନ୍ଦ୍ର କାଏଲ୍ ଚନ୍ଦ୍ର
ହିସାବ୍ ନନିର୍ ପାଁଚ୍ ପନ୍ଦର
ଚାକ୍-ରିଆ ଦେଖି ବିହା ହେଇ ଦେବା
ତୁଇ ମଦ୍ ଭାଟି ମର୍ ବୁ କେଁ
ସେଟାତ ସୁନ୍ଦୁରି ବାବୁ ରେ, ଭୁସାବଲି କେଲା ଧର୍ ବୁ କେଁ । (13)
କୁଷ୍ଟଁ ଆସି ଖେଲ୍ କରି ଯିବା
ଚନ୍ଦ୍ରଶେନା ଆଁ ଫାରି ଥିବା
କାହିଁ ଯୁଗ୍ ର ନିୟମ କାନୁନ୍
ତମେ ବଦଲେଇ ପାରବ କେଁ
ସେଟା ତ ସୁନ୍ଦୁରି ବାବୁ ରେ, ତାର୍ ଲାଗି ତମେ ମର୍ ବ କେଁ । (14)
-ରଜତ ରଞ୍ଜନ ରଣା / Rajat Ranjan Rana
